بلوچستان ایران سرحد پر آہنی باڑ لگانے کی تجویز

Nov 9, 2018, 12:28 pm

اسلام آباد(سنگر نیوز)پاکستان کی سینیٹ قائمہ کمیٹی برائے داخلہ نے ایف سی کیتجاویز پر عمل درآمد کرنے کیلئے پاکستان حکومت کوبلوچستان ایران سرحد پر آہنی باڑ لگانیکی تجویز دی ہے ۔

اس کے ساتھ کمیٹی اراکین نے ایف سی کے منصوبوں کے لیے فنڈز کے فوری اجرا پر زور دیا اور حکومت سے مطالبہ کیا کہ فوری طور پر پیراملٹری فورس کو ہیلی کاپٹر اور جدید آلات فراہم کیے جائیں کیوں کہ بلوچستان جیسے وسیع علاقے کی نگرانی کے لیے ہیلی کاپٹر ناگزیر ہے۔

اس کے علاوہ کمیٹی نے بلوچستان کے متعدد شہروں میں ایئر لائنز کے فلائٹ آپریشن منسوخ کیے جانے کا بھی نوٹس لیا اور اس سلسلے میں سول ایوی ایشن کو رپورٹ کرنے کی ہدایت کرتے ہوئے کہا کہ بلوچستان کے عوام کاحق ہے کہ ان کے علاقوں میں فضائی سہولیات مہیا کی جائیں۔

بلوچستان فرنٹیئر کور (ایف سی) کے ڈی آئی جی بریگیڈیئر رضوان نے سینیٹ قائمہ کمیٹی برائے داخلہ کو بریفنگ دیتے ہوئے کہاہے کہ صوبے میں عسکریت پسندوں کی اکثریت ملک دشمن عناصر کے پروپیگنڈے کو مسترد کرتے ہوئے قومی دھارے میں شامل ہونے کی خواہشمند ہے جنہیں بہتر زندگی گزارنے کے لیے حکومتی مدد درکار ہے۔

میڈیا رپورٹوں کے مطابق سینیٹ قائمہ کمیٹی برائے داخلہ کو بریفنگ دیتے ہوئے بلوچستان کے حالات کے حوالے سے ایک سوال کا جواب دیتے ہوئے انہوں نے بتایا کہ فرنٹیئر کور کی تعیناتی سے قبل بہت زیادہ مسائل تھے لیکن اب صورتحال بہتر ہونا شروع ہوگئی ہے۔

ان کا مزید کہنا تھا کہ مقامی افراد کی مدد کرنے کے لیے متعدد دکانیں تعمیر کر کے بغیر کسی رقم کے ان کے حوالے کی گئیں تا کہ وہ اپنا کاروبار کرسکیں اور اس طرح کیمزید اقدامات کیے جارہے ہیں۔

انہوں نے بتایا کہ ایف سی نے پنجگور میں کھجور کا پروسیسنگ پلانٹ لگانے کی تجویز بھی دی ہے اس کے ساتھ اسکولوں ہسپتالوں کی تعمیر سمیت متعدد ترقیاتی منصوبے زیر غور ہے۔

بریگیڈیئر رضوان کا مزید کہنا تھا کہ بلوچستان میں شورش میں کئی طرح کے مفادات شامل ہیں، ان کا کہنا تھا کہ محدود گنجائش کے باوجود ایف سی پاک چین اقتصادی راہداری(سی پیک) کے منصوبوں اور بلوچستان جانے والے زائرین کو سیکیورٹی فراہم اور بلوچ عسکریت کے پرپیگنڈے کے اثرات کو کم کرنے اور ملک دشمن بیانیے کو محدود رکھنے کی کوشش کرتی ہے۔

انہوں نے سینیٹ کمیٹی کو ایف سی کے تنظیمی ڈھانچے، کامیابیوں، اور اس کی گنجائش بڑھانے کے لیے بجٹ تجاویزاور نئی اور پرانی چیک پوسٹس سے بھی آگاہ کیا۔

کمیٹی کو بریفنگ دیتے ہوئے بریگیڈیئر رضوان نے کہا کہ ایف سی کو داخلی سیکیورٹی اور زخمیوں کو نکالنے کے لیے کیسنا طیارے کی ضرورت ہے۔

قائمہ کمیٹی برائے داخلہ کے اجلاس کی صدارت سینیٹر رحمٰن ملک نے کی جبکہ دیگر اراکین میں سینیٹر کلثوم پروین، جاوید عباسی، اسد جونیجو، رانا مقبول اور شبلی فراز شامل تھے، سینیٹرز نے انسدادِ دہشت گردی کے لیے ایف سی کی کارکردگی کو سراہا۔

http://dailysangar.com/home/page/14034.html

Share this:

Related