شھید سبا تو نمیران ئے – بابا جی آر بلوچ

شھید سبا تو نمیران ئے

نبشتانک: بابا جی آر بلوچ

دی بلوچستان پوسٹ

یک جلکان دو ھزار یازدہ ءِ بیگاہ پہ بلوچ راج ءَ یک دل سوزیں روچے ءِ بستار ءَ یات کنگ بیت، اِے ھما بدیں روچ ءِ دیگر اَت کہ توپک ءُ تیرانی برمش ءَ مئے جان ءِ پُٹ پنژرینت اَنت ءُ یک ٹوھیں ھستی یے چہ مارا پُلگ بوت، بزاں شھید سبا چہ مارا جتا کنگ بوت.
شھید سبا گندگ ءَ یک سادھیں مردمے اَت بلے وت وتی تہ ءَ سرجم ءَ یک ادارھے اَت ءُ…!!!

شھید سبا بلوچ ءِ داتگین پِگر مروچی چوں بولان ءِ سر سبز ءُ شادابیں کوھان اَنت، شھید سبا ھرچ پَلَّو ءِ سر ءَ نِشت ءُ آئی ءَ زانت، سَما ، پِگر ءُ بدلی ءِ سوچ ءِ گَپ کُرت.!!

شھید سبا انکلاب ءِ نشانی اَت ءُ آئی ءِ شپ ءُ روچ پہ بلوچ راج ءِ جھد ءِ آجوئی ءَ ھمگرنچ اَت، آئی ءَ شال ءَ بِگر تا مکران ءُ جھلاوان تا سراوان ءِ ھرچ دگ ءُ دمکاں آجوئی کندیل بلینت ءُ ھرچ گِدان ءَ بلوچ آجوئی ءِ توار سر کُرت… !!!

شھید سبا یک جاھے گش اِیت “اے جنگ راجی آجوئی ءِ جنگ اِنت اے جنگ تا ھما وھد ءَ مان اِیت کہ وھدے کبزہ گیریں ریاست ءِ کدم مئےگلزمین ءَ ھست اَنت ءُ بلوچ پسگاں پہ آجوئی ءَ وتی ھون ریتکگ انت، وتی مال ءُ مڈی، وتی ھیشی سر بکش اِتگ ءُ دگہ یک جاھے گْوش ایت ” نوں بلوچ اوپار کُت نہ کنت، شما لاشاں چگل دیان کن اِت، ما وتی سراں دیان کن ایں، بلوچاں شھید بُوَگ ءِ پیسلہ کُرتگ ءُ پاکستان ناں بلکیں دنیا ءِ ھچ وڑیں تاکت مئے جھد ءَ پروش دات نہ کنت”

سباہ ھما سر اَت کہ ھر جاہ شت وتی تچک ءُ راستیں گپ ئِے جتگ، یکرندے کراچی پریس کلب ءَ تران ءَ بیت کہ پاکستان ءِ نام نھادیں ھالکاریں جنینے پاد کیت ءُ سبا ءَ گپ ءَ نیل ایت، گڑا سباہ گْوش اِیت”من گپ کناں من راست گشاں، شما پرچا راست ءِ کِرّ ءَ ترس اِت ،من ھرچ وڑ ءَ گپ جناں “

شھید سبا بلوچ ءِ پہ زبان ءُ لبزانک ءِ ھاتر ءَ کرتگیں کار ھم چو روچ ءَ زاھر انت، سبا ءَ گْوشت زبان راجانی پجار اِنت، زبان بیت زمین بیت ءُ سیَد زھور شاہ ھاشمی کتاب جاہ پہ ما یک داتگیں سوگاتے کہ آئی ءِ تہ ءَ ھر پیمیں بلوچی کتاب مارا دست کپ اَنت ءُ شھید سَبا چہ مارا نمیران کَنگ بیت، بلے آئی ءِ داتگیں پگر چو نیلیں زِر ءَ ابد مان اِنت…!!!

the balochistanpost.com/2019/06/شھید-سبا-تو-نمیران-ئے-بابا-جی-آر-بلوچ/?fbclid=IwAR3X35o2smWkaYigxReiifK-NO7KTM1Y35Kvmae3UKwonD595JnV0kebjPc