22 فروریءَ، “بلوچستان آجوئی زرمبش”ءِ بنجاهی کمیٹی (شورای مرکزی)ءِ دیوان برجم بیت. ماں اے دیوانءَ لهتے چه بنجاهی کمیٹیءِ باسکاں بهر نه زُرت( دلگوش کنگ لوٹیت که همے باسکاں پیسرا هم چُنت دیوانءَ بهر نه زُرتگ ات، آهاں حال دیگ و چه آهاں دستبندی کنگ بیتگ ات که دیوانءَ بیا انت و بهر به زیر انت). ماں اے دیوانءَ بلوچستان آجوئی زرمبشءِ تها مان آتکگیں تهی جیڑه و آهانی گیشینگءِ سرا گپ و تران بیت.

ماں اے دیوانءَ، آتکگیں سرجمیں بنجاهی کمیٹیءِ باسک و بنجاهی کمیٹیءِ آتکگیں مشاوراں گوں همشوری و تپاکیءَ، مَنّ ات و تپاک کت که ماں چُشیں جاوراں – که لهتے بنجاهی کمیٹیءِ باسکانی سببءَ دیما آتکگ انت – کار هوریگءَ دیما برگ بیت نه کننت( دریگتیں که چوش مبیت انت).

پمیشا ماں اے دیوانءَ ساڑی ئیں بنجاهی کمیٹیءِ باسک و مشاور، جار جنیں که چه اے روچءَ وتی راهءَ چه “بلوچستان آجوئی زرمبش”ءِ هما بهر نه زیروکیں بنجاهی کمیٹیءِ باسکاں جدا کنگ و جار جنگءَئیں که ما پدا ” بلوچستان راجی زرمبش”ءَ برجاه کنگءَئیں و چه اے روچءَ رند “بلوچستان راجی زرمبش”ءِ نامءَ وتی آجوئیءِ جد و جهدءَ دیما بریں و همے پڑءَ کار کنیں.

ماں بلوچستانءِ آجوئیءِ جهدانی پڑءَ، آ دگه باسکانی سوب و کارانی دیمرویءِ لوٹوکیں و امیتواریں که آجوئیءِ جهد تیزتر و اے راهءَ آیوک و جهدءِ دیما بروک روچ په روچ گیش و ودّان به بنت.

زندگ بات بلوچستان

سوبین بات بلوچستانءِ آجوئیءِ جهد