په دادشاهءِ پروش دیگ و مردمانی دلءَ بیمءِ پرّینگءَ، ایرانءِ ژاندارمریءَ بازیں جاهاں بے وسیں بلوچانی سرا زوراکی کت ات و بیگاری گپت ات تا کسے دادشاهءِ کمکءَ مکنت. همے زوراکیانی لهتے حال، کراچیءَ هم سر بیت اتنت. کراچیءِ جاه منندیں ورنائیں وانندهیں بلوچاں، ایرانءِ حکومت و شاهءِ خلافءَ توار چست کت. ماں ماهتاک ” بلوچی” و ماهتاک “اومان”ءَ نبشتانک نبشت. زهرشانی کت، گورنرءِ دفترءَ شت انت؛ وزیرانی گورا شت انت و کاگد نبشت. اے جهد گیشتر هما وهدی بیت انت که احمد شاه گوں جنین و چکّاں، پاکستانءِ حکومتءَ گپت و ایرانءَ لوٹ اِت که ایرانءِ دستءَ دیگ به بنت.
ماهتاک “اومان”ءِ نومبر- دسمبرءِ تاکءَ(1957)، امان الله بلوچ ( امان الله بارانزهی)، دادشاهءِ سرا نبشتانکے نبیسیت و ماں همے نبشتانکءَ، گشیت که دادشاه کئے و چونیں مردمے انت.
جما خانءَ ماں اردو روتاکےءَ نبشتانک نبشت و شنگ کت. بید چه اردو نبشتانک و بلوچانی مُچّی و زهرشانیاں، گیشتریں نبشتانک، آزات جمالدینیءِ شونکاریءَ ماں ماهتاک “بلوچی”ءَ شنگ بیت انت.
