انصافءِ کوش – بلوچ یک جهتی کمیٹیءِ سروکانی زند بندیگی (حبس ابد) ءِ حکمءِ دیگ ماں پاکستانی کورٹءَ، یک برے پدا انصافءِ نامءَ عدل و انصاف بندیگ کنگ بیت

بلوچ یک جهتی کمیٹیءِ سروکانی زند بندیگی (حبس ابد) ءِ حکمءِ دیگ ماں پاکستانی کورٹءَ، یک برے پدا انصافءِ نامءَ عدل و انصاف بندیگ کنگ بیت. بلوچ یک جهتی کمیٹی و آئیءِ سروک که بلوچ زور بیگواهیانی پد جنگ و ودی کنگءَ پُر امنیں جد و جهد کنگءَ اتنت و سرجمیں بلوچستانءِ مردم و دگه بازیں انسانی حقانی پانکجن آهانی حمایتءَ کنگءَ اتنت، پاکستانءِ زوراک و نا انصافیں حکومتءَ گپت و بندیگ کت انت. هَنّی اے هونواریں رجیمءَ وتی عدالتءِ دیم سیاه کت.

ڈاکٹر مهرنگ و شاه جی صبغت الله و آهانی آ دگه بندیگیں همراه، میان استمانی قانونانی بنیادءَ هچ چشیں کارے نه کتگ که اے وڑیں سزا آهانءَ دیگ ببیت. مهرنگ بلوچ، هما انسان انت که آئیءَ وتی کسانسالیءَ، بلوچءِ درد وتی چمّاں دیستگ ات؛ آ هما بلوچ زهگ ات که پاکستانءِ ظالمیں واکداراں، آییءِ پِتءِ جون ٹیکی دات. چه هما وهدءَ، آ گوں وتی همراهاں دگه هزاران بیگواه کتگیں بلوچ پِت، بَچّ، برات و گُهارانی شوهازءَ شپ و روچ جهد کنگءَ ات.

پاکستانءِ حکومتءِ اے کِرد، سهرائیا بلوچ دشمنیءِ شون دیوک انت و هر کس زانت که انصافءِ نامءَ، انصافءِ کوش انت. پاکستان و پاکستانءَ گوں همتوار، هما بلوچ دشمن باید به زان انت که نه ڈاکٹر مهرنگ و نه آئیءِ همراه نه وتی برحقیں جهدءَ یله دَینت و نه آهانی سَسّا و راجی فکرءَ بندیگ کت کننت. بلوچ یک جهتی کمیٹی یک راجی سَسّا و فکرے انت که مروچی هر بلوچےءِ ذهنءَ جاگه کتگ. ڈاکٹر مهرنگ و آئیءِ همراه بلوچستانءِ سربلندیں ماتبندانی وڑا په وتی راجی حقانی گرگءَ په پهر اوشتاتگ انت ستر که آ مروچی بندیگ انت.

بلوچستانءِ راجی زرمبش، پاکستانءِ اے بلوچ دشمنیں کِردءَ په ترندی ایر جنت و محکوم کنت. “زرمبش” چه جهانءِ سرجمیں انسانی حقانی پانکجنوکیں گل و هوربند و دموکراتیکیں مُلک و حکومتاں دست بندی کنت که نه ایوکا پاکستانءِ اے نا انصافیں حکمءَ ایر به جننت بلکیں په ڈاکٹر مهرنگ و سرجمیں همراهانی آزاتیءِ لوٹءَ به کننت.

بلوچستانءِ راجی زرمبش – 23/06/2026